法國國家隊日前喺世界盃慘負南非而宣告首圈出局，正當一眾法國球迷嘆息之際，或者最少有一個人好興奮，此人正係「股神」巴菲特。何解？因為巴菲特嘅投資旗艦巴郡旗下保險業務為客戶承保，一旦法國贏得世界盃，巴郡就要賠錢。家陣呢個戰果，好明顯係巴菲特贏錢，佢又多咗個「賭神」嘅稱號嘞。
咁「股神」收咗幾多注碼？佢老人家冇透露今次法國出局帶挈巴郡袋幾多，對客人身份亦三緘其口，但提到如果法國真係「跑出」，巴郡就要賠3,000萬美元㗎！佢又話，負責呢張保單正係巴郡其中一個保險業務嘅掌舵人──賈殷（Ajit Jain）。或者大家對賈殷嘅認識唔多，但「股神」曾經喺巴郡年報話，如果大家有乜嘢「金額大、而且好奇特」嘅東西要承保，都可以搵賈殷。
講番保單買家，有人估計搵「股神」買呢份保單嘅人，應該係如果法國捧盃自己就要輸錢，於是搵「股神」承保分散吓風險。就好似歐洲最大零售商家樂福（Carrefour）早前賣平面電視機送回贈優惠，話如果法國今屆捧盃就回贈電視機售價嘅一半錢，咁你話佢哋係咪要搵「股神」買保險？
不過，「股神」喺賭呢方面並唔係長勝將軍，喺○七年，波士頓紅襪隊獲得棒球世界巡迴賽嘅勝利後，巴郡旗下嘅連鎖家具商店Jordan's Furniture曾向3萬名顧客退款。
余絲韻