前晚西班牙輸畀瑞士場波肯定連累唔少人輸錢，而尋日匯市炒家如果信市場的話，西班牙可能要求歐盟同國基會打救，加上賣債可能唔理想而走去沽歐元，結果又係輸錢，因為尋日西班牙賣債反應理想，有成2.5倍超額認購，總之都係畀西班牙累。
其實之前三隻「歐豬」包括希臘、葡萄牙同西班牙賣債都係超額認購，根本就冇事，但市場每次炒佢哋賣債可能唔好都有人信，結果中招。
羅傑斯話歐元起碼要十到十五年先至會消失，到時畀個官佢做。確實，歐元低沉了一段頗長時間，昨天又突破1.2350，為進一步打開缺口，後市應以逢低買入為主，保守者可以待匯價自昨天高位回吐100點，即大約於1.23邊才入市買入較上算。否則，估計歐元於1.2300至1.2330水平作橫行整固後才發動攻勢，衝擊50日線（1.2717）。
積臣