阿爺第四大錢莊──農業銀行計劃於七月在中港兩地「A+H」股兩面夾攻上市。工行（01398）、建行（00939）、中行（03988）同農行夾埋就係阿爺Big 4錢莊。老四為咗趕「升呢」，迎戰逐步開放的家園，準備以「今日鄉下，明日城市」為賣點，高速增長搶攻市場冧粉絲；SELL基數低，網點多，增長前景大。
正所謂「在家靠父母，出外靠朋友」，每間阿爺錢莊上市必殺技都勝在朋友夠疊水。新加坡淡馬錫落實為農行基礎投資者，揼水23.4億元。加上一班「長途伴侶」撐場──卡塔爾投資局、渣打集團（02888）、長實（00001）、四叔都話埋堆做基礎投資者，牌面咁大，咪話唔「同坐一條船」。
要記住，農行嘅資產質素及盈利能力一直係Big 4錢莊中包尾。農行○九年不良貸款率就有2.91%，幾乎大其他三兄弟一個碼。萬一市況大上大落，就有可能連預期下限嘅市帳率都唔達標。另外，對整體阿爺錢莊來講，農行大規模發售，更會影響其餘三兄弟嘅再融資活動。
近排Big 3嘅估值已回落至合理水平，基本因素足夠吸引資金流入，加上內銀股已經成為恒指開車嘅Turbo。農行上市對影子股造成短暫刺激效應，內銀股可以留意。
香港大學電子金融服務榮譽助理教授 徐燦傑