絲絲講場：胡祖六偶像係左宗棠
胡祖六辭任高盛大中華區主席近四個月以來，有關佢嘅去向傳出多個唔同版本，一時傳佢有機會出任人行副行長，一時又傳佢自立門戶喺內地成立私募基金，至於邊樣係真，仲要一段時間至揭盅，不過一般都估佢嘅未來發展應該繼續繫於中國。出身於外資行嘅胡祖六心繫中國，原來係受到佢偶像，即係一手平定太平天國之亂並推動洋務運動嘅左宗棠所影響。
實踐經世濟民抱負
胡祖六雖然生於中國，但由於佢早年留學美國，並先後服務於國基會（ＩＭＦ）及華爾街嘅大行，所以唔少人都慣於視佢為「具西方背景嘅中國經濟學家」。不過佢原來曾經向外透露，話自己最期望係好似左宗棠咁實現經世濟民嘅抱負，仲話自己如果並非投身經濟學，都希望一如左宗棠成為衝鋒陷陣嘅將軍。胡祖六喺經濟上都採取以中國本身為出發點嘅分析，甚至曾經對美國政府對華嘅批評作出反駁，唔知同佢咁有民族認知有冇關係？
余絲韻