有機會挑戰史上最高集資額紀錄嘅新股農業銀行，一舉一動均備受市場關注。好似農行H股喺香港嘅上市編號，大家都好關心，呢個冧巴終於揭盅，當然係好好意頭，就係「1288」嘞，好明顯係取其尾數「易發發」嘅諧音啦。農行A股方面，上市編號日前已公布係「601288」，兩者冧巴都咁易記，股民實冇搞錯啦！
睇番其他喺香港上市嘅內銀股，包括建設銀行（00939）、中信銀行（00998）、工商銀行（01398）、民生銀行（01988）、交通銀行（03328）、招商銀行（03968）及中國銀行（03988），上市編號無獨有偶都有「2」、「3」、「8」、「9」等數字，明顯都係取其「生生猛猛」、「長長久久」、「發達」等嘅好意頭。農行作為最後一家仍未上市嘅國有商業銀行，當然唔會輸蝕，改番個靚冧巴，希望股價好似上市編號咁「易發發」啦！
余絲韻