絲絲講場：敦沛劉艷玲輸樓贏經驗

依家香港啲樓咁貴，有「磚頭」揸手自然最實際。絲絲前兩日與敦沛期貨董事總經理劉艷玲（Elaine）傾開，先知原來投資期貨眼光獨到嘅佢，試過買樓蝕到「攤攤腰」，不過經過一輪努力，已經追番唔少，依家仲有幾層樓揸手。

自認炒樓唔叻嘅Elaine，最初由錦繡花園買起，之後買太古城、跑馬地，連中半山都買過，遠至加拿大亦買咗間獨立大屋，買樓速度仲快過大國崛起！一次過有幾層樓揸手，點知都係敵唔過一場亞洲金融風暴，仲一捲就捲走咗成2,000萬元！

聽完佢講，連絲絲都覺得肉痛，但係Elaine講嘅時候又好平靜喎。原來佢之後買吓股票、基金，至今都賺番一半，但就唔係好敢再炒樓喇，依家兩、三層樓作長期投資都仲有嘅。

不過計絲絲話齋，投資蝕錢唔緊要，最緊要身邊有明白自己嘅人。Elaine話雖然自己輸過大錢，但老公都仲呵番佢，冇怪佢，真係難得。

余絲韻