絲絲講場：1881展示九龍百年變
尖沙咀1881商場嘅前身係香港水警總部，依家仲保留咗好多歷史蹤影，喺呢個場地搞歷史相關活動就最啱，長實（00001）與滙豐銀行就合辦咗「從1881開始：九龍百年風貌」圖片展覽，展品係滙豐歷史檔案庫嘅資料，係好珍貴嘅收藏，絲絲都打算喺嚟緊嘅父親節，帶埋爸爸去睇吓九龍嘅百年變遷。
夥滙豐合辦圖片展覽
圖片展嘅主題係追溯九龍發展足迹以及該區嘅商貿發展，見證九龍從一個小村莊演變為繁華都會嘅歷程。透過由滙豐亞太區歷史檔案庫所提供嘅文字記錄、文物、相片、錄影及繪圖等珍貴展品，將九龍百多年嘅景觀風貌、商業活動、人物歷史等發展和變化再次活靈活現咁呈現眼前。
長實副主席李澤鉅話，1881商場原址有逾120年悠久歷史，其地理位置曾經係九龍嘅最南端，能俯瞰喺維多利亞港航行嘅商船，見證九龍嘅不斷變遷。滙豐集團行政總裁紀勤仲話，滙豐約於80年前已喺九龍開業，係首間於九龍開設分行嘅銀行；滙豐與九龍嘅發展息息相關，喺歷史中扮演重要角色。
1881商場營業額升15%
長實地產投資董事黃思行透露，展覽會將展至九月十四日，佢又話受惠於內地豪客，1881商場上半年營業額較去年下半年增加15%，另項目內嘅古蹟酒店Hullett House試業情況理想，早前針對消費額達100萬元嘅「百萬豪客」所推出嘅酒店住宿獎賞，由於反應熱烈，今日起至七月三十一日將再額外加推名額共10個。
余絲韻