市場熱線：中國無線心水之選

不過，祖國魚缸唔爭氣，未能在三日假期後箭嘴向上，A股仍然受制下降軌，令本地魚缸升勢放緩，未能追及隔晚在ADR的升幅。恒指昨日收報20,138點，升76點；國企指數升27點，收報11,583點。成交額未致拍烏蠅，但只有488億元。

細價股漸回復生氣

本地魚缸逐步在二萬點關企穩，雖然近幾個交易日都係高開低收，但古勝反而覺得係大戶引淡倉落疊伎倆，好友仍佔上風。尤其睇番二三線股開始有番生氣，各個板塊亦反彈，整體投資氣氛改善，反映古勝較早前指出，為咗農行登陸魚缸，進行2,000億元巨額集資搞搞氣氛，本地魚缸短期易升難跌，六月份淡友難以發圍。

藍色大隻佬漲跌互見，大笨象（00005）僅升0.2%，競爭對手渣打（02888）跟農行晨早建立戰略關係，而農行已獲准登陸本地及祖國魚缸，刺激渣打股價升4%。本地地主除咗四叔基地（00012）逆市下跌，在眾大隻佬中跑第尾，股價跌逾2%，全因天匯事件影響其今年份成績表，多間大行落井下石，調低其目標價。至於懷疑受場外衍生工具拖冧股價的QQ（00700），股價低處未算低，盤中再創123.1元近月低位，收報125元，走勢相當難睇。

歐元回升，思捷（00330）升1.5%，收報44.85元。奇怪係富士康（02038）竟然受其客仔諾基亞發盈警拖累下跌0.8%，但孖屐點解唔問吓蘋果iPhone 4開始接受訂購，超乎預期大賣，又未能刺激其股價上升呢？所以每當有股份上升下跌，所有原因都係市場解讀，一句到尾咪因為有人沽貨同買貨囉！沽壓重自然跌，個個搶貨自然升啦！其他大隻佬表現無乜特別，紅色錢莊股個別發展，紅色地主卻受銷售額可達預期的利好消息所刺激，普遍回升。

品牌已建立知名度

三網融合雖仍未落實最終方案，但相關股份昨日做好，講來講去又係話快喇快喇，缸湖傳聞好事近。事實上，無論三網融合何時落實，祖國谷行3G發展，好肯定對祖國電訊商，以及電訊設備供應商一定受惠。加上為爭取3G市場佔有率，流動電話營運商繼續為手機作出補貼，祖國手機市場需求不受外圍經濟波動所影響。

中國無線（02369）一向係古勝心水，主要係其估值較具吸引力，現價計預測市盈率約12倍，絕對抵買。集團早前發盈喜，預期截至六月底止中期盈利，將較去年同期錄得顯著增幅。睇番集團相關產品的銷售數據，主要受惠於祖國3G移動電話市場迅速增長及3G電話產品銷售額增加。

至於中國無線的優勢在於產品橫跨祖國三個3G制式，旗下的酷派手機，係祖國名氣相當大的「土炮」手機品牌，中國無線今年的前景值得看高一線。

戰報

金山能源（00663） +12%

詩詩周一推介金山能源，當日低位0.199元，昨日高見0.223元，升幅達12%。

古勝