自從金融海嘯後，華爾街被描繪為萬惡罪魁，早前銀行家搏命收天價花紅，畀人鬧到好似過街老鼠咁，要化解呢啲詛咒，最佳方法就梗係捐錢畀慈善組織。不過受到之前金融海嘯影響，有好多慈善團體收少咗善款，可動用嘅錢自然少咗，所以好需要靠今年補番數。
好似人稱「壞孩子基金」嘅TCI咁，佢哋就主要捐錢畀協助亞洲及非洲受剝削兒童嘅CIFF，不過截至去年八月嘅一年內，CIFF只係用咗1,790萬英鎊，較上一年用3,060萬英鎊少好多。
CIFF用少咗錢其中一個原因係水喉乾乾哋，TCI呢啲對沖基金嘅收入唔係咁穩定，例如喺○七年好景嗰陣，TCI就豪捐3.25億英鎊，不過喺去年咁差嘅市況下，佢哋就只係捐出1,900萬英鎊，真係可以差成十幾倍。為咗令弱勢社群有足夠捐款，希望今年嘅投資環境唔好咁差喇。
余絲韻