近排絲絲收到風，第一代輪商代言人雷裕武（Moses）休息一年多後重出江湖，繼續做番老本行，出任中銀國際衍生工具部執行董事，負責窩輪、牛熊證及股票掛鈎票據等衍生產品嘅銷售推廣，已經返咗新工一個禮拜。Moses喺暫別金融界期間，主要替教會及非牟利組織做義工，分享自己嘅投資經驗及推廣親子理財。
本港窩輪市場向來競爭激烈，輪商不斷喺各大媒體爭取曝光，Moses早於○一年已加入市場，先後喺麥格理、滙豐及蘇皇做過衍生產品銷售，絕對係第一代輪商代言人，絲絲記得當年佢與「輪后」李頌慈嘅曝光率都好高。
不過，中銀國際一直唔係活躍嘅輪商，市場佔有率亦唔高，今次招兵買馬請嚟Moses助陣，又開始喺報章落廣告，似乎好有野心要喺衍生工具市場分一杯羹。同時市傳有意喺今年發行窩輪嘅渣打（02888），近日亦準備得如火如荼，睇嚟本地輪場好快會有一番龍爭虎鬥。
余絲韻