自從麥倩華（Francesca）喺去年七月正式上任為滙豐銀行香港區個人理財業務主管後，令滙豐嘅個人理財業務增添唔少生氣，其曝光率之高相信係歷年罕見，可見滙豐呢位女將幾有魄力。
絲絲近日聽友人講，經常忙個不停嘅Francesca終於停下來放大假一個月，原因何在？呢個絕對係大喜訊息，原來佢要嫁人喇！絲絲認識唔少滙豐銀行嘅女「賓卡」，一係就早已結婚，一係就係單身貴族，好少話做到呢啲位嘅時候走去結婚，能夠事業愛情兩得意，真係可喜可賀！
平時見到Francesca都係一副硬朗形象，估唔到佢會選擇去非常浪漫嘅法國結婚，莫非佢其實係一個浪漫柔情嘅人？
雖然佢喺上周六結婚，但上周一佢仲喺香港嘅記者會講吓有關「Y世代」嘅調查結果，對婚訊冇洩露半點風聲，跟住就飛咗去法國準備婚禮，你話佢編排嘅時間幾咁緊湊，做事幾有效率，呢啲正正係滙豐銀行嘅精神。不過話晒係人生大事，點都要暫時放下工作，同老公享受新婚蜜月期，所以大家要見Francesca就要喺回歸紀念日之後啦！
余絲韻