孖妹缸湖遊：黃金牛市要識玩

孖妹年頭睇過風水書，認定今年幸運顏色係金色，加上內地五月份CPI按年升到3.1%，百物騰貴，通脹殺到埋身，因此深信黃金牛市冇咁快玩完。世界黃金協會遠東區董事總經理鄭良豪及敦沛金業副總裁李卓峰都儲埋好多金，佢哋話現階段冇打算放住，同時教授投資金市技巧，值得大家參考。

鄭：世界黃金協會遠東區董事總經理鄭良豪

李：敦沛金業副總裁李卓峰

金市宏觀 受惠通脹 需求續增

莉莉︰今年股債都跌，只有金價逆市升，係咪反映通脹來勢洶洶？

鄭︰過去40年，歐洲政治家太慷慨，向國民提供充裕嘅社會福利及生活保障，結果要無限量發債，要其他歐盟國家及國際貨幣基金組織（IMF）舉債幫手還錢，成個歐債危機係「冰河推進」速度衍生，解決方法只有減福利及減人工等，相信都要用番「冰河推進」嘅漫長時間先化解到問題。歐美大量發債，增加貨幣供應，若國民生產力唔相對提高，貨幣購買力就會下降，所以通脹係有機會來臨，亦係近年黃金受重視嘅原因。

高妹︰遲啲會唔會變成惡性通脹？

鄭︰通脹會出現，但唔會演變到八十年代嘅惡性通脹，當時供樓要畀成10厘息。由於科技發達、資訊傳遞得好快，國際金融機構會　實事件演變嘅後果，當預見災難發生，援助措施亦好快出台。其實每樣資產都會經歷「花開花落」嘅過程，有少少通脹係好事，打工仔人工高咗，投資時就算遇到另一次金融危機都唔會太傷。

莉莉︰金價咁高，係咪要等調整過後先入市？

鄭︰黃金牛市未完，見到央行對黃金態度改變係我今年嘅新體會，各國央行選擇揸實金，令金市出現結構性變化，推高需求數量。中國對首飾需求每年保持8%增長，係支持未來幾年金市嘅主要動力；下一步就睇美國經濟，若年底美國人嘅消費力有起色，有機會令黃金需求進一步膨脹。我睇金價短期等唔到每安士800美元，1,200美元支持力好強。

飾金保值 買「4條9」 勿太花巧

高妹︰所以要習慣金價喺1,000美元樓上！如果想買定啲金飾保值，乜嘢類型嘅金飾值錢啲？

李︰買金投資要保值，一定買「4條9」，雜質少，比18K及24K金更值錢，另外，成色（純度）高低對飾金保值有影響，最好買有「優質足金標誌」嘅金飾。其實飾金買賣差價比金粒仔及金條大一半，呢幾年仲愈嚟愈闊，一出一入已經唔見咗8%。

莉莉︰揀乜嘢花款嘅金飾可以賣得貴啲呢？

李︰唔好買太多「扭花」及接駁位多嘅金飾，金飾扭動多，代表熔金時手工亦多，手續費會計貴啲。另外亦可以考慮「貨換貨」，換金較賣金嘅價錢會着數啲，戴耐咗悶悶地，可以換番件同斤両嘅新金飾再戴。

高妹︰幾時買金飾最好？

李︰每年嘅年底係結婚旺季，飾金價錢多數貴，一年入面，喺六月至八月期間，飾金市場價一般會低啲，係買入嘅好時機，我咁多年買落嘅金飾都係揀呢三個月份買。

教沽飾金 須扣火耗 貨比三家

莉莉︰阿媽都買落幾條金鏈，若打算第日拎去賣，有乜嘢要留意？

李︰買金時最緊要留單，因為寫明重量，避免畀人呃；成色方面，部分收金公司對飾金只得一個價，唔理乜嘢金都收，有時會放到好價錢，所以最重要係貨比三家。仲有最好去番買金嗰間金舖度賣，佢哋了解自己出產黃金嘅成色、有冇雜質，扣火耗都扣少啲，一般火耗會將件金飾價格扣咗一折。

高妹︰你會唔會將私伙金飾賣出去？

李︰呢兩年覺得黃金太貴，已轉買鑽石及白金嘅首飾。之前所有買落嘅金飾擺咗落保險箱，都升值咗一倍，但送晒畀老婆，我哋依家冇諗過放，金價去到1,400美元就可能會考慮吓。

莉莉︰你認為金價幾時見頂？

李︰一般商品牛市有10至15年嘅周期，歐美大量印銀紙、發債，又還唔到錢，所以黃金會繼續受追捧，黃金牛市最快喺二○一二年底先完。估計今年金價唔會跌穿1,100美元，待調整到1,160美元左右可長線吸納。

賣飾金方程式

飾金收金價＝每両收金價×重量×90%（扣火耗）×98%（扣2%佣金）

70.9%散戶寧趁低買股

外圍經濟不穩，環球股市上升乏力，不過金價就受惠於市場避險情緒升溫，上周二再創歷史新高。股票平、黃金貴，散戶又會揀邊樣嚟買呢？據今期《東方產經》網上民意調查，截至上周末晚上6時，調查顯示散戶買嘢都係貪平，選擇買股票嘅人有70.9%，揀買黃金嘅只有29.1%。

高妹、莉莉

若有料報畀高妹同莉莉或有嘢問，可電郵money.biz@opg.com.hk