「世界盃終於開鑼！」雖然真係好精彩，但希望大家在睇波之餘，都畀心機做匯市分析；若然係「無時間」做分析，咁不妨暫時唔好做買賣，因為世上亦無「免費午餐」這回事。
今日既是一周之初，就同大家講講大圍形勢。英鎊自五月二十日低見1.4231後已反覆回揚，上周尾段重上10日及20日線，MACD牛叉持續，短線若然上破1.48阻位，中線有望更上一層樓。
歐元方面，歐債問題畀市場「炒到爛」，見歐元一級一級落，暫時未有轉勢迹象。不過，要留意的是，關於歐債的新負面消息對市場的影響力似乎愈來愈細；若現時有甚麼利好歐元的消息出現，市場或借機作一個較大力度的反彈，屆時已沽出歐元的投資者必須嚴守止蝕的紀律，以免因小失大。
講開歐元，就睇埋歐日交叉盤的周線圖，發現上周匯價終止了早前六連跌的趨勢（亦是自一九九九年以來最長的周線圖跌勢），相信與上周中國數據表現向好，令部分投資者意識到歐元區問題可能未如想像般壞，進而增強了投資者的風險胃納，重拾對高收益貨幣的興趣有關（相反即對避險貨幣如日圓等需求下降）。
在市場氣氛改善下，商品貨幣近日轉強，澳元及紐元均反覆回升。紐元繼早前在0.6560水平營造雙底後，近日上升動力持續，匯價上周已升穿10日及20日線，MACD牛叉急速拓闊，短線或可一試50日線（0.6995），不妨在0.69小注買入紐元，止蝕位0.6850。
阿Lam