「歐豬五國」債務危機未解決，又多個國家匈牙利話唔掂，歐美股市上周五顯著下跌，拖累港股尋日低開。內地股市持續偏軟，收市前跌幅收窄，恒指亦從低位反彈，收報19,378點，跌401點。詩詩暫時未有持倉，外圍股市吹無定向風，都係再睇定先入市。
雖然大市疲弱，但有個別科技及家電股逆市走強，先進半導體（03355）昨日逆市升6.7%，估計已成功探底。集團之前公布首季業績，成功扭虧為盈，期內營業額較去年同期上升58.6%至1.86億元，主要受惠於晶圓銷售增加。
由於晶圓製造廠的總體產能使用率有改善，由去年第四季的44%增至48%，令整體毛利率從去年底5.8%，提升至15.8%水平。今年首兩個月定單錄得明顯增長，其中8吋晶圓定單更超越其產能，今年業績將顯著增長。
另一方面，先進半導體早前已被中國政府授權批准，建立自主知識產權的汽車電子芯片產業化製造平台，目前係中國首家汽車電子芯片製造晶圓廠，亦係唯一一家，所以集團亦受惠內地汽車業起飛。先進半導體正處於復甦期，盈利有機會以倍數回升，現價買入，首個目標0.5元，跌穿0.28元止蝕。
詩詩