絲絲講場：澳徵資源稅嚇壞常振明
藍籌股中信泰富（00267）近年經歷唔少風風雨雨，依家恢復穩定，主席常振明嘅穩定指揮應記一功，不過對於最近澳洲公布可能開徵稅率高達40%嘅資源稅，就連佢咁EQ穩定嘅人都講咗句：「畀佢嚇親！」
身兼中信集團副董事長及總經理嘅常振明綽號「救火隊長」，過往嘅戰績都唔少，而且每次都能超標完成，證明佢嘅綽號係有根有據。中信泰富喺○八年爆出「炒燶」澳元Accumulator醜聞，連前主席榮智健都搞到要辭職唔撈，好多人都估常振明會重披「救火隊長」嘅戰衣，依家佢仲執緊中信泰富嘅手尾。
中信泰富西澳有項目
常總出山後，將中信泰富全面轉型為鐵礦資源公司，幾經艱苦終於穩定公司局勢，但正所謂「福無重至，禍不單行」，估唔到澳洲總理陸克文早排突然話有意向當地所有資源項目徵收所得稅，稅率仲高達40%，撞啱中信泰富喺西澳洲有個大型鐵礦項目開始動工興建，搞到向來鎮定嘅常總都話「好震驚」。資源稅呢單嘢有排搞，做資源開發嘅公司真係有得震冇得瞓！
余絲韻