絲絲講場：致富鄧澤堂搞「私竇」
返完一日工最好相約老友食飯，舒舒服服傾吓偈。致富證券資產管理部董事鄧澤堂放咗工都鍾意同三五知己「Fine dining」，周圍搵地方飲酒消遣，佢最近就與兩位圈中好友夾份，喺中環蘭桂坊開咗間餐廳，佢話有咗個「私竇」，可以過吓「老闆癮」之餘，第日飲飲食食就方便得多，佢希望間餐廳最快喺半年至一年後回到本。
啱啱榮升做東主，日夜工作兩邊走，致富大老闆有冇微言先？鄧澤堂話，原來致富證券董事總經理周松堦唔單只冇責怪佢「秘撈」，仲身體力行支持佢。
周老闆冇詐型兼試菜
一直鍾意食中菜嘅周老闆，親自到餐廳試食西餐之餘，仲對樓面裝修及燈光設計等畀足意見，又問佢使唔使幫手擇吉日開張，佢對員工真係無微不至。
其實鄧澤堂平時做嘢咁有效率，加上餐廳有另外兩位老細，大家可以輪流夜晚睇舖，所以周老闆都好放心，唔怕佢「秘撈」。
絲絲覺得鄧澤堂都幾有生意頭腦，皆因香港人愈來愈識飲識食，你睇近年多咗好多與食嘢有關嘅電視節目就知啦！
余絲韻