孖妹缸湖遊：練好EQ炒股添勝算

恐懼感構心理陷阱

每次遇上大跌市，莉莉都忍唔住沽咗啲蟹貨，原因都係心理驚慌。記得美國有位臨床心理學家Roland Barach寫過一本書《Mindtraps─Mastering the Inner World of Investing》，當中提到恐懼感會造成3種基本心理陷阱：（1）當股價正在下跌時，你會賣掉股票，因為驚跌得更深；（2）錯過最佳買貨位，因為股價處於低位時，人心會有恐懼；（3）賣得太早，因為恐怕原先嘅利潤會唔小心輸埋。

睇過呢本書，高妹先知道原來EQ唔夠高，會令人做錯投資決定，相信好多股友亦會遇上呢個問題。為咗管理好大家嘅EQ，高妹就去咗搵臨床心理學家黃婷傾偈，希望可以搞搞個「心」，而唔開心嘅莉莉亦去咗搵致富證券資產管理部董事鄧澤堂吐吓苦水。

致富證券資產管理部董事 鄧澤堂 投資失誤自我冷靜

莉莉：聽講你讀中學時已經炒股，仲會趁住食晏時間走去銀行睇股票報價。

鄧：嗰陣係九十年代初，香港啱啱經歷完股災，經濟又迅速起飛，好多人都有炒股票。我跟同學仔仲試過揀選心水股票組合，第二日再齊齊睇價，考吓大家投資嘅眼光。

莉莉：我知你測過IQ（智商）有145分咁高，難怪你醒目過人啦！

鄧：唔好咁講，其實投資除咗IQ高，落盤時都要靠快捷嘅反應，以及對經濟、股市、股票有長期研究先得。因為我好細個已經接觸股市，所以好早就感受到股市升跌速度以及嗰種壓力，總之做任何事要成功，就一定要靠自己努力爭取。

莉莉：唔少股友喺股場蝕咗錢都會發小脾氣，你又有冇呢？

鄧：我嘅EQ都唔高，間中都會發吓脾氣，好似拍枱同埋掟筆咁。不過，呢啲情況通常喺我遇上市況唔公平時先會出現，如果只係自己睇錯市，咁就冇得嬲啦。

莉莉：你有乜嘢增強EQ嘅好方法？

鄧：其實遇上投資失誤時，你去洗個臉、飲杯水，然後抖一抖，等自己有個冷靜期，之後嘅投資效果都會好啲。

臨床心理學家 黃婷 輸錢自責易失理性

高妹：我想知道IQ同EQ有乜分別？係咪IQ高嘅人，投資賺錢能力會高啲？

黃：一般而言，IQ高嘅人嘅教育程度、工作表現及收入會成正比，但EQ係指個人能否控制情緒，高EQ嘅人通常唔會因小事而產生劇烈情緒波動，反而對人事方面有合理嘅想法。不過，現時EQ已被認為係預測一個人能否取得職業成功及生活成功嘅有效指數。

高妹：遇上股市波動，EQ較低嘅人會變成點㗎？

黃：投資者對金錢數字較為敏感，如果遇上大跌市而且又有輸錢，佢哋感到憂慮之餘，亦會怪責自己，咁樣反而會令佢做出更多唔理性嘅投資決定，變成一個惡性循環。

高妹：有時我見到恒指大跌，跟住自己個證券戶口金額冇咗幾個位，個心又痛，個人又會抖唔到氣，好辛苦。

黃：當投資者遇上失眠、胃口唔好、腸胃不適，又或者成日發脾氣、精神唔集中、唔開心之餘，甚至唔想返工，呢啲情況若持續一至兩星期以上，其實就應該去睇吓心理醫生，以防出現情緒病。

高妹：你作為臨床心理學家，投資時又會唔會受到股市波動影響心情呢？

黃：我嘅投資態度比較保守，都係投資藍籌股、基金及物業，平時好少留意市況。其實有冇受市況影響主要視乎個人嘅投入感，所以投資者應該嘗試發展炒股以外嘅興趣，將注意力分散，令生活更加平衡。

散戶炒股當「打機」

孖妹邊有隔夜仇㗎，第二日就已經約埋一齊去耀才證券喺中環新開嘅分行探吓股友。專門短炒本地地產股嘅散戶黃先生話，滿意自己嘅EQ幾高，見住自己成手蟹貨都心如止水，持有嘅太古（00019）因分拆地產項目事件，股價跌到佢都唔捨得放，結果一綁就綁咗4個月。佢話：「我投資時會保持『打遊戲機』嘅心情，當錢係分數，跌得太多唔理佢，等抽升番先諗止蝕。依家外圍太波動，散戶都係任人擺布，冇得嘈，自己見到股價每日有1%至2%嘅波幅先會入市。」

至於樂觀派嘅散戶蘇先生就話，IQ高只係投資者贏錢嘅其中一個因素，仲需要個人投資經驗、對股市及股票有深入認識嘅輔助至得。佢好坦白咁講：「以前年紀輕，投資本金又少，喺股場上輸咗錢都唔識得驚，最多咪從頭來過；依家年紀大咗，更加唔想輸錢，輸咗又會有啲唔開心。不過，投資始終都係識得驚好過唔識得驚嘅。」

25.9%股友沽貨睇世盃

炒股令人情緒緊張，睇世界盃又何嘗唔係呢？根據過往經驗，股市喺世界盃比賽期間一般較為淡靜，因為唔少投資者會掛住睇波而無心炒股，咁股友們又會唔會暫時沽貨離場呢？根據今期《東方產經》網上民調，截至上周末晚上6時，有25.9%人話會沽貨離場，話唔會嘅就有74.1%，呢個結果證明大家都係鍾意炒股多過睇波。

高妹、莉莉

若有料報畀高妹同莉莉或有嘢問，可電郵money.biz@opg.com.hk