市場熱線：東航留意低吸機會

花旗魚缸高台跳水

花旗魚缸亦上演高台跳水，道指挫323點，散場收報9,931點，再次失守一萬點關。促使花旗魚缸急瀉，除了牛肉國言論外，花旗國本身嘅就業數據表現遜於預期，亦成沽售藉口，事緣其五月份非農業就業人口僅增43.1萬人，遠低於市場預期嘅53.6萬人，顯示就業市場仍未有起色。

G20國集團財長及央行行長會議上周六閉幕，花旗國財長蓋特納叫歐洲和東瀛國搞好內需，提振經濟，又促請中國放手讓人民幣升值。其實引發金融海嘯嘅黑手係邊個大家都知，自己嘅蘇州屎都未清理好，就喺度對其他國家嘅經濟政策指指點點，古勝都聽到「O」晒嘴！

本地魚缸上周五散場微跌6點，收報19,780點。萬料不到當晚外圍股市全軍覆沒，恒指今日低開幾成定局，或再下試19,000至19,200點區域。正所謂「跌市莫估底」，都係見步行步。

上周五全球股、匯下挫，就連商品市場亦現震盪。金市本來係資金避難所，但金價亦因為炒家要沽貨套現到其他市場填氹而受壓。「油魔」亦不敵淡風，紐約六月期油跌2.9%，每桶報74.42美元。油價回軟，有利紅色飛機嘅業績。事實上自本月起，祖國航空煤油出廠價已下調每噸220元人仔，由於航油成本佔總成本比例超過四成，此舉可直接紓緩幾隻紅色飛機嘅經營壓力。

今年首四月，內地民航業錄得盈利93億元人民幣，行業景氣好轉，難怪上月「大摩頭」及「高佬盛」齊齊唱好亞太區飛機股。講開紅色飛機，中國東航（00670）近年嘅重頭戲「東上重組」（與上海航空合併重組）經已大致完成，藉着上航具備嘅遠程國際航線能力，未來東航將以上海市作為平台，陸續開闢遠程國際航線，東航嘅競爭力將得到明顯提升。

協同效益值得憧憬

今年首季度，東航賺7.69億人仔，同比增長18倍，嚟緊與上航合併嘅協同效益可堪憧憬，加上暑假期間將有更多旅客到訪上海世博，前景正面。參考「高佬盛」上月將東航嘅評級由「中性」上調至「買入」，目標價睇4.9元。唔好太貪心，趁市況波動留意喺2.8至3元邊進場嘅機會，博業績報佳音，股價重上50日線3.8元都夠和味！

古勝