外圍股市顯著上升，帶動昨日港股反彈，恒指升逾300點，又重返10日線之上。不過，內地股市仍弱，加上港股成交持續薄弱，未能配合升勢，估計維持上落市格局。詩詩未有入市買賣，二三線股個別發展，講到鑊氣似乎唔多夠，都係靠邊站。
尋日家電股表現突出，內地家電「以舊換新」政策擴大，利好家電產品銷售。全國家電以舊換新工作會議上有新協議，家電以舊換新政策推廣實施期暫定為今年六月一日至明年十二月三十一日，並將原有9個試點省市，增加至28個實施省市。威靈控股（00382）可以話係目前股價最細粒家電股，集團去年業績成功扭虧，盈利3.53億元，較○八年增長80%，每股盈利2.62仙，恢復派息0.5仙。
去年底內地政府開始推「家電下鄉」政策刺激消費，料今年威靈的業績增長更理想。從公布的各地新增家電下鄉補貼品種分析，抽油煙機的最高補貼限額為338元人民幣，威靈主要生產抽油煙機馬達，應可直接受惠。
睇番威靈股價持續下跌個多月後，目前已重返去年的大型橫行收集區水平，現水平再下跌風險有限。況且大股東美的之前以0.42元批股畀機構投資者，呢個位上車，博升到班接貨大孖沙返家鄉，上升空間已逾四成，穿0.26元止蝕。
詩詩