之前由渣打過檔澳紐銀行（ANZ）擔任中國區CEO嘅葉楊詩明（Christine），唔經唔覺已經做咗一年幾，長駐上海做ANZ中國業務掌舵人。絲絲尋日喺上海見到佢，聽見佢講嘅普通話一啲都唔「普通」，先知道原來佢去咗上海已有5年，所以就連上海話佢都識聽。
絲絲聽聞，當年出任滙豐亞太區行政總裁嘅邵銘高（Michael）跳槽去ANZ做CEO時，有唔少滙豐人都追隨Michael蟬過別枝，而無獨有偶，Christine任職渣打前亦曾効力過滙豐香港區。
雖然唔知Christine過檔ANZ與Michael係咪有關，但可以肯定Christine甚得Michael器重，唔係都唔會成個中國市場畀佢打骰啦。
不過Christine依家呢個位真係一啲都唔易坐，因為近年外資行紛紛致力拓展內地市場，尤其係內地經濟喺金融海嘯中依然屹立不倒，富戶數目與日俱增，各間外資行當然唔會放過任何掘金機會啦，而ANZ喺內地仍處於起步階段，自然要面對好多挑戰。Christine仲同絲絲講，話Michael對佢都有要求，不過佢為人積極，話內地市場咁大，大家爭唔晒嘅，而且有壓力先有進步喎。
余絲韻