市場熱線：昆侖買得安心

本地魚缸昨日裂口高開，恒指高開350點，升破20日線，最高見19,859點。可惜又係祖國魚缸累事，深滬兩指數倒V形回落，弱勢未改，本地魚缸升勢受阻，未能升破上周反彈高位19,910點，更莫講話要一舉突破二萬關。恒指散場收報19,786點，升314點；國企指數升238點，收報11,397點。現貨場成交額只有515億元，反映缸邊友在未能洞悉魚缸去向前，未敢貿然入場。古勝估計隨着世界盃開鑼，成交將繼續縮水。

祖國移動走勢麻麻

好友繼續搵大笨象（00005）幫手撐住大市，股價再升2%，收報72.9元，又再升抵20日線阻力，若然未有成交配合，大笨象或要行人止步。另一巨無霸祖國移動（00941）靠穩，收報73.7元，微升0.7%，暫補回上月下旬的下跌裂口，但連續三日高開低收，公仔圖表驚見三支陰燭，後市走勢難樂觀。歐元日前下試4年低位後靠穩，受歐元波動影響較大的思捷（00330），回升5.8%，成為大隻佬升幅冠軍，一日天堂一日地獄，係思捷近日的走勢。缸湖傳聞上月祖國新增貸款6,000億人仔，符合市場預期，紅色金融股反彈，升幅由2%至4%不等。不過，農行趕住登陸魚缸，紅色錢莊的擴股增資計劃要讓路，估計升幅有限，又係暫時炒波幅。

下周官府再拍地，今次係市區靚地，位於何文田，唔少本地地主吼準本地高檔屋仔市場唔憂賣，有靚屋唔怕無人接貨，相信競投會比最近兩次賣地更激烈。三兄弟檔口（00016）無懼屋仔市場轉吹淡風，旗下新盤加推又加價，對銷售新盤信心十足。至於紅色地主似乎已漸消化利淡因素，昨日繼續反彈。房產稅講咗一段時間，缸湖傳聞短期在上海先推出，在下認為當落實公布，反可以掃除不明朗因素。除非北大人再出更狠招式打壓內地屋仔市場，否則紅色地主最難捱時刻似乎已過。

「油魔」回復精神，石油股反彈，唔少大行出吹水報告，指祖國在新疆試點開徵資源稅，對能源企業影響有限。昨日幾件石油股均升逾2%，古勝較睇好昆侖能源（00135）。前身中油香港的昆侖能源，於○八年八月進行重組，隨後斥資向阿媽中國石油天然氣集團收購多項天然氣項目，包括華油天然氣、深南石油及中油中泰等，銳意從上游勘探業務轉型至天然氣業務，預料至一五年整體收入將達500至1,000億元人仔，其中上游生產和城市燃氣的比例將各佔一半。

母公司注資陸續來

昆侖目前擁有11個石油項目，分別位於7個國家。孖屐一直憧憬，阿媽未來會將所有下游業務，包括城市管道網絡及天然氣加氣站等規模達數千億元的資產，注入昆侖之內，將其打造成為中石油集團在天然氣終端業務的旗艦。

再睇番港交所（00388）的股權變動資料，阿媽在五月份先後3度在市場增持昆侖股份，合共增持逾2.4億股，令持股量增至56.12%。3次增持平均價在9.9元水平，反映阿媽認為跌穿10元水平好抵買。另一方面，發改委自六月一日起實施「油降氣漲」，即降低汽油柴油價格，但就提高天然氣出廠價格，能為昆侖的股價帶來短線刺激。

古勝