相信大家對滙源（01886）呢個中國果汁品牌唔會陌生，可能亦都聽過唔少有關滙源主席朱新禮白手興家嘅故事，但原來幕後功臣係佢父親先啱。朱新禮話自小與父母感情好好，雖然父親係個農民，但好有文化修養，對每個仔女都落足心機教導，對日常生活嘅一點一滴都有嚴格要求，亦都係咁令到朱新禮精益求精，希望表現得到父親嘅一句讚賞，連佢都話自己嘅事業係為父親而做。
亦因為咁，佢父親喺九九年突然去世對佢打擊好大，佢頓時覺得自己好似失去咗重心及依靠，嗰兩、三個月真係感到心灰意冷，更一度想過放棄如日方中嘅事業。
好彩最後佢諗到自己員工嘅飯碗、公司對社會嘅價值，於是諗通咗父親不但望子成龍，更加想佢做個有社會意義嘅人，所以就堅持落去，咁先有今日嘅滙源咋！
朱新禮又話畀絲絲聽，佢哋山東人深受儒家文化影響，個個生活都好節儉，佢好厭惡奢侈同燈紅酒綠嘅生活。仲話一啲都唔覺得自己係富豪，只當自己係個普通人，所以貴為主席嘅佢都冇自己辦公室，仲成日着住公司制服及老土嘅尼龍襪，呢啲咁樸實嘅行為不但感染咗佢啲員工，仲為佢贏到唔少生意機會，因為啲合作夥伴見到佢咁慳，都好放心同佢合作，怪唔得滙源生意愈做愈大喇。
余絲韻