內地又傳短期落實執行房產稅，拖累相關板塊下跌，深滬股市跌逾2%。不過，昨日英美股市休假，加上係五月份最後一個交易日，港股即使無乜方向，亦會撐到尾，基金例牌粉飾櫥窗，恒指最終僅跌1點。投資組合內的旭光（00067）持續反彈，一日反彈升勢未改，詩詩仍會持有。
除咗旭光，市場上仍有唔少股份已跌至估值極為吸引水平，卡姆丹克太陽能（00712）股價亦跌至接近去年底上市以來的低位。卡姆丹克主要生產大尺寸、高效率的太陽能單晶硅片。去年由於原材料成本大幅下降，以及下游市場需求增加，公司盈利顯著上升。預計全球光伏市場持續增長，卡姆丹克在細分市場具領先地位，其技術水平亦較先進，估計未來一年產能有條件倍增，盈利得以大幅提升。
雖然歐元匯價疲弱，或會對卡姆丹克的收入構成負面影響，但整體硅片價格開始回升，加上成本下降，集團整體毛利率料可改善。另一方面，集團的客戶結構經整理後，更趨多元化，財務狀況亦穩健。截至一○年首季為止，集團擁有淨現金約2.53億元人民幣。睇番卡姆丹克去年底上市招股價為2.1元，相等於一○年預測市盈率12倍，以10倍市盈率計算，可見1.75元，現價買入，跌穿1.3元止蝕。
詩詩