絲絲講場：法巴鄺樂天想搞古董基金
留鬚嘅男人有冇魅力，絲絲就唔知，但多少都屬於思想型，法巴亞太區高息股票主管鄺樂天（Arthur）一臉鬍子，佢閒時鍾意沉思，特別係去到充滿歷史文化色彩嘅地方。Arthur酷愛中國文化，佢話有次欣賞《清明上河圖》就用咗4至5個鐘頭，鑽研畫上每一部分；另一次參觀北京故宮內嘅乾清宮，旅行團多數一至兩個鐘頭就遊覽完嘅旅遊勝地，佢就用上10個鐘頭，即使只係一間細房嘅軍機處，佢都睇咗兩個鐘頭。
投資首選兵器
Arthur對中國文化咁熟悉，原來一直都想搞隻「古董基金」，話有信心做好呢隻基金嘅基金經理，不過組成團隊就有難度，要搵啲熟悉鑑證學嘅分析員。成立呢隻基金嘅另一個難度係基金成本好高，投放喺保養及儲存古董方面嘅資金要好多。
「好多年前乾隆寶座只係賣幾百萬元，去年就以幾千萬元嘅天價成交，呢個寶座世界上只有一張，我諗再過多一段時間，賣一百億元都有可能。」Arthur仲話，基金嘅投資策略會首選刀劍及兵器，因為呢類古董嘅愛好者特別多。
余絲韻