聯想集團（00992）董事長柳傳志日前喺香港以母公司聯想控股董事長身份，大談聯控要來港上市嘅大計，尋日佢老人家又返到無錫演講，今次柳總要分享嘅，係佢當年創業時曾經畀人呃咗300萬人仔而搞到病咗，結果仲要住咗3個月醫院先無事。
話說喺八七年，聯想仲係一間公司仔，當年為咗入口機器，要將人仔轉成外匯到香港，結果畀深圳一家進出口公司呃咗300萬人仔，要知道當年聯想一年嘅利潤只得嗰百幾萬人仔，柳總唔激氣就有鬼，為咗追返被呃嘅錢，柳總甚至蹲喺人哋門口。
雖然最後佢都成功追回300幾萬人仔，但之後佢三更半夜都會被嚇醒，而且愈嚟愈嚴重，講嘢竟然九唔搭八，結果要到海軍醫院調理咗3個月先好番。
柳總仲話佢唔只一次畀人呃，創業初期畀人呃過好幾次，但睇番今時今日聯想嘅成績，可能會覺得當年嘅「學費」係值得。
余絲韻