絲絲講場：花旗助學生非牟利實習

除咗喺商場、金融界打滾外，社會上好多熱血嘅青年人都會投身非牟利組織服務，花旗集團尤其欣賞呢班熱心嘅年輕人，專登贊助一班商科嘅大學生去呢啲機構做實習，等佢哋利用商界專才知識，幫非牟利機構實踐可持續發展。

絲絲尋日見到好多莘莘學子，聚首一堂出席呢個大學生社責實踐計劃嘅結業儀式，有學生仲即場分享佢哋實習期間嘅所見所聞。花旗集團香港區行長章晟曼見到一班學生咁投入參加，活動又咁受歡迎，感到好安慰，仲話咁反映呢種跨界別合作可以提高學生對社會經濟問題嘅關注，而且亦有助非牟利服務機構嘅長遠發展。

哈哈，跨界別嘅英文即係Crossover咁話，香港人一聽到Crossover就會覺得零舍「潮」，花旗可以諗多啲打Crossover主意嘅活動，相信吸引力一定會大增！

余絲韻