絲絲講場：馮孝忠領軍 一日植樹萬棵
唔使絲絲講，相信大家都知道環保有幾重要。要做到環保，除咗平日慳電慳水減少浪費資源外，仲可以好似恒生（00011）嘅員工咁，親身到大自然種樹，佢哋仲一次過種咗一萬棵樹添！
夥地球之友護理植林
恒生銀行總經理兼財資及投資業務主管馮孝忠（Andrew）喺剛周日就帶同超過70名恒生員工及家屬，聯同香港地球之友去咗屯門徑附近植樹，據講嗰度曾經被山火燒毀過；恒生除咗植樹之外，仲會與地球之友合作護理該植林3年。
唔知平日經常對住電腦及一大堆數字嘅Andrew，植完成日樹之後，吸多啲新鮮空氣，有冇覺得醒神咗呢？不過可以肯定嘅係，佢哋所種植嘅樹，可幫助防止水土流失、為大自然生物提供棲身之所以及製造多啲氧氣。
原來自九九年，恒生已經喺本港先後種咗7萬棵樹喇。除咗植樹，恒生仲鼓勵大家珍惜樹木，所以好鼓勵客戶及股東選用電子月結單，電子投資通知書及電子年報，佢哋話咁樣每年可減少使用超過1,800萬張紙，相等於減少砍伐約1,100棵樹。
余絲韻