銀行界出身嘅冼國林，早前因為本身嘅詠春武術背景，染指電影圈出錢出力，先後參與投資兩齣有關佢師公葉問嘅電影，搞搞吓仲做埋創業板上市公司國藝控股（08228）主席，果真係搞電影搞上癮。
絲絲尋日同佢傾偈，佢都承認自己搞功夫電影搞上癮，而今次出任國藝主席，就係由於董事局希望佢能以主席身份，幫手帶領公司電影及娛樂製作業務嘅發展。
國藝嘅前身係慧峰集團，原本由潘國廉兒子潘樹人做行政總裁兼大股東，早幾年係威係勢，話要喺香港搞供電，引發咗唔少討論，至今當然冇晒下文。去年十月透過發股份收購電影娛樂業務，引入咗冼國林及其拍檔為新股東，改名國藝控股。除咗冼國林正式出任主席，原主席鄧日明就調任行政總裁，潘樹人亦改為只出任公司執行董事，冼國林將收取每年96萬元年薪，佢同老婆依家持有約5.23%國藝股份。
冼國林話，公司去年向佢收購電影娛樂業務後，佢一直都以顧問名義協助電影娛樂業務製作嘅推行，佢已親手完成另外兩齣分別為民初及時裝嘅功夫電影劇本，日後會畀國藝開拍，不過佢亦強調喺搞電影之餘，亦會一心二用，繼續親自帶領第一信用財務嘅發展。
余絲韻