孖妹缸湖遊：海嘯踢出第2波？

「金融海嘯」一詞係由「債券大王」格羅斯開創，早喺雷曼「爆煲」前，佢已經警告股市會掀起一場「金融海嘯」，經歷「美國911」事件以嚟最傷嘅跌幅。結果預測應驗，環球股市急插水，大量資金流入美國國債市場避險，雷曼「爆煲」當日，10年期國債價格被搶高，孳息率一日跌咗0.33厘。

「海嘯第二波」係去年二月金管局前總裁任志剛苦口婆心提醒大家嘅，任總話第二波會以3種形式擴散，對亞太區股市嘅殺傷力會更大，之後出現嘅冰島事件、東歐危機、杜拜世界等事件，都會令預言來勢洶洶。

孖妹就以打工仔角度去睇「海嘯第二波」嘅定義，就係如果引發新一輪裁員潮或者凍薪，咁就真係殺到埋身。早前聽到有投行勁派花紅，似乎經濟環境又唔係真係咁差，專家又點睇呢？

Grace：摩根資產管理投資服務副總裁譚慧敏

陳：大福證券分行業務助理董事 陳日嵐

Leo：天行聯合證券資產管理部大中華區區域業務總監 焦勇

全球「雙底」言之尚早

莉莉︰你擔心歐債危機會引發「海嘯第二波」嗎？

Grace：市場對「海嘯第二波」仍未有共識，歐洲覺得已進入「第二波」，與九七亞洲金融風暴嘅情況一樣咁差。但我認為兩次危機唔同，當年利息好高，依家政府都採寬鬆嘅貨幣政策，所以歐債危機只屬於「地區性股災」，話全球會出現「Double dip（雙底）」仍言之尚早。

高妹︰我就擔心「第二波」會殺到，恒指轉眼就跌咗一成，大市係咪會經歷熊市？

Grace：眼見全球經濟唔係冇復甦，整體採購經理指數（PMI）做好，歐元大跌其實有助刺激出口，估計經濟可以慢慢復甦，所以呢一刻調整屬正常，大市未返去熊市。報告仲顯示，目前大部分基金經理仍增持股票，我哋亦稍為看好股票，但現階段唔敢太勇入市。

下月買貨吼內房內銀

莉莉︰幾時入市先唔易畀大戶震走？

陳：恒指近期每日上下波幅唔小，而且平均成交金額達600億元以上，反映投機者都開始積極入市，估計六月份個市會淡靜啲，普遍人冇乜心機買貨，呢個時候係入市嘅好時機，大戶都專吼淡市大肆收貨，所以下月要識揀抵買嘅股份。我建議二、三線股份就唔好掂住，買番啲大隻嘅內房及內銀股，擺半年以上都有肉食。

要盯緊外圍三大因素

高妹︰想開始撈貨嘅股民，嚟緊要睇實乜嘢數據？

Grace：要留意三大因素，第一係歐洲銀行孳息與美國國債孳息嘅息差，依家雖然唔算大問題，未去到雷曼時嘅水平，但若果息差再扯高就有啲擔心；第二，唔應該再有「政策錯失」，包括法國想退出歐元區、德國自行實施限制沽空，若再發生類似事件，或令市場再次恐慌；最後係整個歐元區嘅最新動向，希臘重整債務嘅解決方案未清晰，葡萄牙及西班牙嘅債務危機未知會否拖累其他銀行。

莉莉︰大陸出招抑制經濟增長過熱，資金幾時先會流返嚟香港？

Leo：香港嘅資金仍然好多，中央早前落重藥醫治只患咗「感冒」嘅內地市場，若目前唔加強宏調，通脹勢頭未來可能難以抑制，而宏調見到嘅成效需要等幾個月先反映出嚟。估計內地樓價從高位計算要調整10%至20%，大市會先跌定，待負面消息亦消化得七七八八，投資者可於第三季後期入市，預料今年全年大市會有逾10%升幅。自己就唔擔心出現「海嘯第二波」，歐元係「Too huge to fail（巨大到不能倒）」。

講番莉莉男友，佢呢排成日估今年世界盃邊隊會捧盃；瑞銀及摩根大通用數量模型預測世盃冠軍分別係巴西及英格蘭。今次兩位專家都會睇世盃，鍾情阿根廷嘅Leo，估計贏面最大係意大利，有興趣嘅股友可以參考；Grace就冇乜心水，只話鍾意巴西球員卡卡，所以一定會睇有巴西隊嘅賽事及總決賽。

15.6%人估恒指跌穿萬六

持續惡化嘅歐債危機最終會拖累恒指跌到乜嘢水平？今期《東方產經》網上民意調查，截至上周末晚上6時，認為港股會跌落18,000點、17,000點及16,000點或以下嘅人分別有30%、10.2%及15.6%，有信心已經見底嘅只有44.2%。

高妹、莉莉

若有料報畀高妹同莉莉或有嘢問，可電郵money.biz@opg.com.hk