市場熱線：百麗睇位收集

本地魚缸在當地掛牌的ADR全線下跌，大笨象（00005）跌近1元，險守70元關。今晚係花旗魚缸假期，五月份可以先作總結，在呢個月內，道指累跌7.9%，不僅創下去年二月份以來最大單月跌幅，更係自一九四○年以來，表現最差的一個五月份。

歐元仍未擺脫弱勢

雖然本地魚缸上周五在ADR表現不濟，但古勝認為今日本地魚缸未必會跟足跌幅，主要係今日為月結，好友咁辛苦收復成千點失地，又豈會輕易放棄。況且市場唔少散戶資金在上周反彈期間流入做淡，好淡友必有一番角力，只要祖國魚缸唔好走樣，本地魚缸仍會頂多兩下頭槌。

儘管唔少斷估專家認為，本地魚缸已見底，加上祖國魚缸已靠穩，更有指已成功尋底，不過在下卻未敢太樂觀。始終歐洲債務危機陰影揮之不去，即使各國元首出盡口術撐歐元，歐元僅在嚴重超賣下略見反彈，仍未能擺脫劣勢，相信今年跌勢持續，仍需向下尋底。

至於各地魚缸在超賣下反彈，古勝僅視之為「死貓彈」。加上六月世界盃開鑼，根據過往經驗，世界盃舉行期間，魚缸表現例靜，就算唔屠殺都牛皮，所謂「十個牛皮九個淡」，古勝相信六月份本地魚缸只會反覆向下，每次反彈係減磅好機會。看官最好輕身上路，做好準備迎接下一輪跌浪。

講開世界盃，由呢項體育盛事所引發的效應，自今年初已顯現，一眾體育用品股受捧，其股價表現在跌市期間亦見硬淨。除咗呢個因素，體育用品股係內需股，亦係古勝認為可以避開祖國政策調控，唔受歐洲債務危機影響的避險股。

致力強化營運效益

百麗國際（01880）係在下近年愛股之一，集團較早前公布四、五月份，因受到異於往常的較寒冷天氣影響，銷售表現不及首季，但管理層有信心，全年同店銷售增長可達雙位數，而運動產品的銷售，繼續可錄得單位數增長。

通過內部整合，及優化運動產品業務，係百麗目前的重點工作，當品牌結構和店舖結構完成整頓，相信經營能力可增強，未來的利潤可保持理想增長。不過，睇番百麗現價估值唔算平，待魚缸再調整，可趁低吸納作中線投資，現水平實在唔需要急於追貨，可留待股價回調至9.5元才收集。

古勝