絲絲講場:鄭海泉「請假」愈描愈真

滙控(00005)主席葛霖嘅去向以及我哋好熟悉嘅鄭海泉「請假」之謎,係近日銀行圈嘅熱話,葛霖尋日親口為自己闢謠,但點知喺演辭中露咗口風,令鄭大班「請假」傳聞更為可信。

葛霖露口風可圈可點

絲絲早前已講過滙豐中國董事長鄭海泉請假兩個月,雖然佢之後話「冇請兩個月大假」,不過係咪以其他形式請假就不得而知。葛霖尋日喺演辭中話鄭海泉因為「暫時未能出差」,所以缺席股東大會。

呢句說話真係可圈可點,有乜嘢情況下會令一個高層「暫時未能出差」,連每年最重要嘅股東會都唔到?總之就係令放假之說更為可信。股東大會咁重要都唔露面,鄭海泉下月恐怕都未必會出席上海新總部嘅開幕儀式喇。尋日缺席股東會嘅除咗鄭大班,仲有約翰桑頓(即傳聞中嘅葛霖接班人),佢因為剛入院治療,遵醫生囑咐不宜遠行。

鄭海泉雖然缺席,但依然有小股東向佢「翻舊帳」,有印度小股東話,滙控收縮印度消費融資業務,令當地信用卡客戶好慘,要求身為滙豐亞太區前主席嘅鄭海泉道歉兼辭職,不過葛霖就唔認同呢位小股東嘅講法。

余絲韻