利昌金舖常務董事胡經昌有「小金王」嘅稱號，佢應該有好多私伙金條喇，有日絲絲同佢傾偈，佢自爆話有時會攞啲私伙金條出嚟，用放大鏡去睇吓，一見到印喺金條上面嘅「利昌金舖」呢4隻字，成個人都會特別精神同開心喎。
香港人始終都係儲銀紙多過儲金條，聽聞有啲銀紙多嘅人，得閒會拎啲錢出嚟聞吓，又或者攞個熨斗熨直啲銀紙，咁唔知黃金又有冇氣味嘅呢？點知胡經昌又笑住咁話：「黃金就冇，但我個身就有，哈哈！」
之前胡經昌呻窮話冇錢買黃金，其實佢儲咗黃金廿幾年，分分鐘真係黃金仲多過現金，所以冇錢買金一啲都唔出奇。當絲絲問到佢將啲金條收埋喺邊時，胡經昌就十分風趣咁答：「梗係唔話你聽啦，驚你查到呀！」有排都未夠65歲嘅佢仲話：「冇錢唔緊要，因為我有黃金嘛，遲少少我仲會去拎埋政府嘅生果金添。」
余絲韻