絲絲講場：羅家聰「搵食」好精明
早兩日港股大跌，絲絲搵咗有「港版末日博士」之稱嘅交通銀行首席經濟及策略師羅家聰傾咗幾句，之後我哋仲話遲啲約食Lunch添。不過，揀地點食飯向來唔係絲絲強項，相反羅家聰喺中環返工多年，一早知道晒邊度有平嘢兼好嘢食，佢話：「中環飲茶喺中午12點前埋單可以有八折優惠，而蘇豪區亦有啲餐廳推出88蚊嘅Set Lunch，有前菜、頭盤加甜品。」中環「搵食」一向艱難，真係要熟地頭。
推新書搵黃元山講Talk
傾吓傾吓，絲絲仲知道佢即將推出新書，喺下周六舉行新書發布會。雖然羅家聰平時講嘢寸寸哋，但其實佢份人好鬼風趣，好似今次新書發布會，佢就搵埋小學校友，現為中大全球政治經濟社會科學碩士課程兼任講師嘅黃元山做嘉賓，一齊講吓投資分析。至於點解會搵黃元山幫手講Talk？羅家聰笑笑口話：「佢好似比較得閒嘛，而且講嘢又夠自動波。」絲絲向來鍾意睇書，嗰日一於早啲去拎簽名至得。點知羅家聰又講笑：「吓，我哋係去講嘢，唔係去簽名㗎喎。」
余絲韻