絲絲講場：富國舵手膺最高薪賓卡
金融海嘯後，銀行家嘅薪酬備受關注，《彭博市場》雜誌公布咗50位最高薪嘅銀行高層，富國銀行CEO斯通普夫（John Stumpf）榮登榜首，去年賺2,130萬美元，按年增長逾倍。
獲授股帶挈大賺
以往都係高盛、花旗嘅CEO成為最高薪酬「賓卡」，何解今次富國銀行CEO可登上榜首？原來喺○八年底金融海嘯，有唔少銀行參與美國政府價值250億美元嘅救助計劃，去年底銀行要向財政部歸還貸款，同時財政部放寬銀行高管薪酬規則，當時富國銀行董事會給予斯通普夫一筆價值1,000萬美元嘅富國銀行股票，由於富國銀行股價去年大升，因而造就佢成為最高薪酬嘅銀行家CEO。
依家唔少銀行家都避開薪酬及花紅問題，以免招惹是非，特別係受到財困影響嘅銀行，銀行家紛紛放棄花紅，只收基本薪酬。高盛CEO布蘭克費恩○八年賺取4,095萬美元，去年薪酬只有86萬美元，由○八年嘅榜首跌至去年嘅48位，花旗CEO亦由第3位跌至50位。
余絲韻