絲絲講場：李小加股場賣米籌款
絲絲尋日見到一個奇景，就係居然有人喺港交所（00388）交易大堂內走嚟走去公然籌款！絲絲問番啲老行尊，個個都笑笑口話，係開埠以來首次有人喺大堂內賣米，因為大堂內係嚴禁進行證券交易以外嘅活動。咁邊個咁大膽？之唔係港交所行政總裁李小加囉。
交易大堂義賣創先河
小加尋日風塵僕僕，下晝去咗香港上市公司商會演講，然後就趕返公司籌款，義賣樂施米，當然佢係等到4點鐘收市後先至開始義賣啦！在場交易員見到CEO笑面迎人遞上慈善米，亦都樂意乖乖奉上廿蚊，加上尋日大市反彈，交易員心情好轉，部分更捐出「紅衫魚」。有交易員話，CEO親手遞上嘅米留為記念，唔捨得食喎。
今次係小加首次親身領軍籌款，但原來佢履新唔夠5個月，已參與過好幾次慈善活動，好似上周日港交所公司內部搞足球賽籌款，小加就捐錢兼落場踢波。今日聖雅各福群會眾膳坊搞食物捐贈活動，小加都會到場，為港交所提高唔少社會形象分。
講番轉頭，大家可能好想知道，究竟交易大堂內有冇試過搞籌款活動呢？答案係冇，因為怕會影響交易運作，最多只會喺大堂出入口放置捐款箱，對上一次係南亞海嘯，當時善款箱收集嘅錢就捐畀紅十字會。
余絲韻