市場熱線：國藥大行睇好

花旗魚缸咁精壯，亞太區魚缸昨日亦乘機反彈，本地魚缸經周二急挫逾600點後，昨日早段恒指高開近200點，但升抵19,200點水平又遇阻力，上半場曾再一次跌至萬九邊緣。下半場祖國魚缸整固，未能為本地魚缸起拉動作用，及至歐洲魚缸開工跳彈床，恒指在接近散場前，以較高成交推上，收報19,196點，升210點。國企指數則收報11,016點，升287點或2.6%。

雖然現貨場成交額增加至727億元，但古勝唔相信本地魚缸已成功尋底，預料呢次反彈難以重越19,500點，唔排除期貨場結算過後，再展開新一輪跌浪。

思捷繼續冇運行

藍色大隻佬普遍反彈，近日跌到一仆一碌嘅富士康（02038），昨日一度反彈逾一成，散場升7.1%，收報5.69元。可憐係受歐元插水影響的思捷（00330），昨日續跌2%，收報41.05元，再一次在眾大隻佬中跑第尾。缸湖傳聞祖國保監會近日召集保險機構高層秘密會議，放寬保險金投資範圍，消息刺激紅色保險股及紅色錢莊股上升，升幅由1%至5%不等。

大笨象（00005）微升0.8%，股價重上70元，公仔圖表未有改善，仍處於跌浪中，加上反彈成交縮水，明顯動力不足，下一支持在63元水平，在下相信必試無疑。祖國移動（00941）升1.1%至72.75元，二奶電話（00762）卻勁升5%至9.35元，皆因二奶電話內部測試iPad應用，又成為短線落鑊藉口。至於紅色地主亦有反彈，但古勝唔建議入場，皆因在祖國屋仔市場價格未見明顯回吐的情況下，北大人唔會放棄打壓屋仔市場，博反彈見好要收。

龍頭地位夠穩固

古勝講過內需股係跌市中較具防守性的股份，此外，科技股及醫藥股亦有同樣功效。祖國的醫療改革係唔會因為經濟狀況而暫停，所以醫藥股可趁跌市分段收集。古勝一向強調，買股要買龍頭股，國藥控股（01099）作為祖國市場一哥，其市佔率早於○八年時已遠遠拋離同業。

此外，國藥一直尋找有潛力的購併機會，藉此擴大業務規模，以及加強零售網絡。目前國藥的零售網絡已覆蓋全國19個省，同時獲得祖國100間最大規模藥廠之中的95間藥廠供貨，另獲30個國際生產商支持，在祖國同業中無人能及。

國藥一直係芬佬寵兒，有多間大行均曾發表吹水報告唱好，最近「大魔頭」曾發吹水報告指國藥已呈超賣，一旦反彈，力度可高達70%至80%，值得關注。

古勝