絲絲講場：王曉初向港記笠高帽
幾家中資電訊商領導層久不久就傳出會大玩音樂椅嘅遊戲，好似近日盛傳中移（00941）董事長王建宙就快退休，中電信（00728）董事長王曉初更被傳會調到其他政府部門「升官」，就連美資大行高盛尋日都發表研究報告，估計中資電訊商高管層嘅執位好有機會喺下半年發生。
升官傳聞未收到料
中電信尋日舉行股東會，除咗正常嘅競爭、減價等大路問題，梗唔少得執位嘅提問，不過跑慣江湖嘅王總早有準備，首先就向在場嘅傳媒大笠高帽，話好佩服佢哋嘅消息靈通，佢話好多時喺內地都冇聽過嘅傳聞，都會喺香港開記招時由傳媒口中聽到，又話成日都係由香港傳媒話畀佢聽，佢將會調去邊個新崗位工作。王總最後當然都係話自己到尋日為止，都冇聽過有關調職方面嘅傳聞，不過絲絲見到，當佢聽到話傳聞會調去做官嘅時候，佢嘅笑容真係相當燦爛，唔知咁算唔算係蛛絲馬迹呢？
余絲韻