恒地系呢排好威水，接連投到靚地，絲絲即刻打畀恒地（00012）副主席兼香港小輪（00050）主席林高演恭喜吓佢，Colin（林之洋名）亦心情大靚，皆因喺樓市唔明朗下，小輪可用「合理價」投得粉嶺地，佢講呢塊地嘅位置優點時更如數家珍，出乎絲絲意料之外。
原來Colin曾經幾次微服私訪，視察呢塊地嘅周邊環境，佢竟然巡視埋隔籬個街市幾十個檔口，大讚啲生果又平又靚，啤梨、蜜瓜、夏威夷木瓜數出一大堆，更加試過茶樓啲點心，讚嘆食物係「香港水準、深圳價錢」；佢甚至親身試搭埋由地盤到粉嶺站嘅小巴，話車費只需兩個六，由粉嶺站到中環站國金中心返工，就只要幾十分鐘車程。
Colin仲講畀絲絲知，話興建嘅新屋苑會起兩條天橋，一條連接購物中心、一條連接個平價街市，仲Plan埋屋苑穿梭巴士線，話青沙公路段依家好方便，經沙田嶺、尖山兩條隧道，由粉嶺出九龍快咗好多。
Colin呢位大當家梗係唔會住粉嶺喇，絲絲就講笑咁問，老闆「四叔」（李兆基）剛啱投到白加道塊超級豪宅地皮起屋畀屋企人住，唔知落成後，佢呢位元老兼重臣會唔會有機會入住呢？Colin就哈哈大笑話絲絲傻，強調間大宅淨係姓李嘅人住㗎，而佢只係一個打工仔喎。
余絲韻