道指上周四晚狂插，幸好上周五晚回升，ADR只係跌百幾點，加上A股反彈，照計二三線股經過上周四「小股災」之後應可博吓反彈。好多股仔由高位計已大跌一半，好似隻浪潮國際（00596）公布全年業績令人大失所望之後，由1蚊插到最低0.59元，但到該水平好似已跌得差不多，上周四更逆市升兩仙，收報0.62元，睇落往績市盈率都係8.4倍，仲有大把現金在手，以一間科技公司而言真係平得無道理，同係業績差，隻中軟國際（00354）就好樣得多。
浪潮舊年下半年業績大為走樣，主要係行政推廣開支大增，令人擔心今年上半年的毛利率。業務方面，電訊行業服務表現最好，銀行業服務則因競爭問題表現較差，軟件外包更因不符預期而需作商譽撥備；「王牌」產品稅控收銀機因多省招標出現延誤，收益未必能維持；ERP則表現不俗，今年並計劃向中小企拓展，同金蝶（00268）和用友搶生意。
雖然浪潮去年下半年業績令人失望，但負面因素已在股價中反映，股價已較今年初高位下瀉55%，公布業績後個多月亦跌了40%。浪潮始終係內地科技界知名企業，業務相當廣泛，未來更有「三網融合」概念，應有反彈機會。
詩詩