孖妹缸湖遊：油金股匯彈力比併

孖妹記得小時候有種玩具叫做橡膠彈力球，你愈大力掟個波，個波嘅反彈力就愈大，仲會彈得愈高。受歐洲債務危機影響，上周金價急升後回落，油價亦曾跌穿70美元關口，令石油股表現一般；散戶追開嘅內房股又跌多過升，加上歐元屢創4年新低，呢啲因素都令港股走勢變得反覆。講真吖，錢就得一舊，要買貨梗係買啲有強勁反彈力嘅嘢啦，咁即係買乜好？聽吓專家點講喇。

內房股 100%機會反彈

恒豐證券研究部董事 林家亨

高妹：散戶都幾鍾意買內房股，但中央頻頻出招壓抑樓市，內房股係咪冇運行？

林：我對內房股充滿信心，一直以來都係愈跌愈買。我肯定喺今年底前，內房股會有100%機會成功反彈，投資回報率一定好過買黃金，起碼黃金都唔會生息喇。

莉莉：內房股有乜嘢利好因素令你咁睇好？

林：其實中央一直冇打壓內地樓市，如果人民買樓自住，政府鼓勵之餘亦有按揭優惠；至於買樓做投資或者係投機嘅炒家，就要符合一啲規則，同埋冇按揭優惠，可見政府係唔鼓勵呢類行為。其實調控樓市措施係正面行動，長期會令樓價健康咁進入上升軌道。

高妹：但市場一味唱淡內房股，搞到散戶唔敢買貨。

林：高股價永遠喺憧憬中出現，低股價就喺絕望中出現。現時唔少內房股嘅現金多、欠債少，而且樓房儲貨量低，呢啲都係良好基本因素。我認為散戶可於現價買入個別內房股，而持貨者就千萬唔好沽貨作止蝕，否則將來只會後悔。

今年金價高位睇1300

Cantor Fitzgerald（HK）Capital Markets公共關係及策略分析主管 黃耀明

莉莉：金價上周一度升上1,249美元高位，但點知後勁不繼，究竟依家仲買唔買得過？

黃：金價升主要係因為歐洲債務危機因素，資金為咗避險，於是流向黃金，但呢個消息已炒得七七八八，所以金價升勢唔會持續，短線會有所調整，有機會跌到1,000至1,100美元，現階段我唔建議散戶入市。

高妹：咁你點睇今年金價高位？

黃：我嘅態度係審慎樂觀，高位約係1,300美元，金價有60%以上機會反彈。

莉莉：黃金投資工具都有唔少，咁買乜好呢？

黃：黃金ETF都唔錯，穩陣之餘又比較緊貼金價升跌；倫敦金則有槓桿成分，風險較高，投資者要計算清楚可承受風險程度；而金礦股始終會受基本及外圍因素影響，股價未必能跟足金價升勢。

揸歐元散戶惟有祈禱

恒生投資服務首席分析員 溫灼培

高妹：歐元岌岌可危，你有乜睇法？

溫：睇淡。美國收緊貨幣政策，但歐盟就加推貨幣寬鬆；歐洲經濟混亂，令投資者對歐元價值產生質疑，令資金流走至其他貨幣；歐元一定要弱勢，以幫助出口。

莉莉：年底前歐元有冇機會反彈？

溫：進入六月份，歐元應該會明顯反彈，但之後會再跌過，今年極其量只會升到1.32美元水平。我建議大家喺1.3水平做止蝕，今年內都唔好掂歐元嘞。

高妹：嘩，即係唔使旨意歐元會有強勁反彈喇！

溫：即使歐洲債務危機解決，但歐盟國家經濟仍然好弱，所以要靠弱歐元去改善經濟狀況。反彈機會存在，但持久力短，彈完都會再跌。

莉莉：咁揸住歐元嘅散戶除咗止蝕，仲可以點做？

溫：為歐元祈禱啦！

買石油股兩年可豐收

交銀國際控股研究部董事 黃文山

高妹：美元轉強，油價係咪冇運行？

黃：油價短線有壓力，但70至80美元屬合理水平，資源股表現麻麻都係正常。

莉莉：今年內石油股反彈力度好弱？

黃：我估今年恒指高位約係23,000點，調整時跌1,000點都唔出奇，而通脹多數會喺二○一二年來臨，到時油價一定會升，如果現價買入石油股，持貨兩年嘅回報率一定翻幾番。

高妹：嘩，揸兩年貨好大難度喎！

黃：依家好難估計環球市況仲會發生乜嘢事，當國家出現經濟危機時，投資者信心自然變弱，以歐洲為例，救市嘅其中方法就係發債，但資金會流向美元及黃金，可見國民連自己國家都信唔過啦！

57%睇好中港股票

唉，歐洲債務危機未完全解決，環球市場仍會波動，唔知各位認為現時最值得吸納嘅資產係乜呢？根據《東方產經》網上民調，截至上周六晚上6時，有17.4%人揀黃金，揀中港股票嘅有57%，揀債券嘅有5.2%，揀澳紐元等高息貨幣嘅有10.2%，揀其他嘅就有10.2%。

放大圖片

放大圖片

高妹、莉莉

若有料報畀高妹同莉莉或有嘢問，可電郵money.biz@opg.com.hk