市場熱線：重整旗鼓

一如所料，歐洲債務危機持續，上周五歐洲魚缸繼續冇運行，花旗道指更一度失守一萬點關，跌穿牛熊分界250日線9,942點，低見9,918點後才現反彈，散場報10,193點，倒升125點，但一周計仍重挫4%。後市道指反彈至10,500點已成阻力位，短線一萬點關承接仍備受考驗。

風高浪急少做少錯

呢個星期花旗財長蓋特納來華，兩國將進行第二輪中美戰略及經濟對話，今次議題廣泛，本來市場焦點離不開人民幣匯率問題，但勢估唔到呢個月歐債危機令歐元走晒樣，人民幣升值可能性即時大大降低，話唔定今趟花旗國會知難而退，暫且放過人民幣匯率議題，等撲熄歐洲火海，先至再從長計議。

正正由於全球股市風險仍然高企，歐洲債務危機解決進度又難以掌握，短期仲係少做少錯為妙，免損耗銀彈。古勝相信，股海浪潮漲退總有時，樂觀啲睇，次季全球股市調整未必係壞事，次季市場調整幅度足，相信第三季會以整固為主，末季基金年結前，股市有望好頭好尾，所以如今大家最重要係持盈保泰，重整旗鼓，並依循國策方向，耐心觀望低吸實力股機會。

上周五祖國魚缸先低後高，滬綜指觸及全日低位2,481點後現反彈，散場報2,583點，升1%。繼國家稅務總局澄清，地方對房產稅徵收範圍沒有解釋權後，發改委官員向內地傳媒表示：「三年之內免談房產稅」，官員言論應有助消除市場對中央再次出招打壓屋仔市場嘅憂慮。

事實上，如今祖國面對嘅外部環境情況惡劣，保持內部需求持續增長變得更加重要，屋仔市場調控力度要適可而止，否則樓股齊挫，同胞身家縮水，消費信心一旦逆轉，又如何推動內需？

如無意外，本來預計喺第二季出現嘅加息和人民幣升值，極可能會延至第三季才出現，估計未來一個月滬綜指將於2,400-2,500點水平盤整築底，屋仔市場過熱威脅逐步消除，中長線祖國經濟將可迎來更健康發展。

內需股可優先留意

正正由於推動內需係國策嘅重中之重，所以古勝始終認為，內需股係較為穩陣嘅股份，可趁大跌市留意中長線收集實力內需股嘅機會，如最近提過嘅中糧控股（00606）、銀泰（01833）以及百盛（03368）。

新能源股亦係可以留意嘅國策股類，美國商務部部長駱家輝上周喺中美商會便重點談及新能源市場，相信今次兩國會談會就同共開拓潔淨能源市場達成共識，可以關注比亞迪（01211）、中傳動（00658）、龍源（00916）及鉑陽太陽能（00566）。

另一方面，由於次季歐、美市場情況轉差，今年中國出口表現未必能達到市場預期，出口股前景未明，估值有下調壓力，即使短線有反彈，小心食「彈散」，思捷（00330）股價一浪低於一浪係好例子，其他如招商局（00144）、「貓貓狗狗」（01199）亦暫宜避之則吉。

古勝