好多人以為銀行家「利」字當頭，以賺錢行先，不過，野村亞太區聯貸主管科爾（Jose Cortes）為咗追求理想，就放棄高薪厚職去做領隊，專門帶有錢及好喜歡去旅行嘅亞洲旅客到非洲探險，完成佢哋嘅非洲探險夢想。
科爾住喺香港十多年，但佢對非洲情有獨鍾，亦好熟悉非洲。佢話記得喺九十年代去非洲度假，當地人同佢講，去非洲嘅亞洲旅客愈嚟愈少，當時佢已知道呢個係商機。直到「九一一」事件後，佢辭去摩根大通亞洲聯貸團隊主管一職，休假4個月，與一名銀行家創辦專營非洲探險旅遊。佢話非洲充滿活力，而且世界盃即將喺呢個地方舉行，雖然非洲係好貧窮嘅地方，但佢會出一分力幫助佢哋。
佢喺○三年重返金融界，喺巴克萊工作，之後轉戰雷曼，雷曼倒閉後就加盟野村。幾番輾轉後，佢都係選擇做領隊，仲話會全身退出金融界，因為已經44歲，好多銀行家到五、六十歲會失去心中嘅一團火。老闆曾經同佢講，話呢5年會係佢人生中最搵錢嘅時候，不過佢就認為錢唔係全部，所以選擇去做自己喜歡嘅事。
余絲韻