絲絲講場：英皇鐘錶搞乒乓派對
英皇鐘錶珠寶（00887）做開名牌鐘錶代理權，能夠攞到咁多靚品牌，一定係同啲客關係好好，佢哋嘅董事總經理楊諾思同絲絲講，話做生意一定要保持緊密良好嘅合作關係，日前佢哋就搞咗個「乒乓派對」，與客戶過咗一個好開心嘅晚上。
名牌夥伴聚首聯誼
呢個「乒乓派對」喺中環蘭桂坊Tazmania Ballroom舉行，佢地邀請咗多位合作夥伴出席，交流聯誼。各品牌管理層難得聚首一堂，交流心得之餘更切磋乒乓球技，共度愉快一夜。楊諾思話，公司未來將與不同鐘錶品牌合辦一系列嘅腕錶展覽，繼續將最新最矚目嘅鐘錶傑作呈獻畀一眾愛錶之人。
英皇依家擁有超過20個享譽全球嘅鐘錶品牌代理權，包括勞力士、百達翡麗、卡地亞、愛彼錶、名士、蕭邦、歐米茄、伯爵及江詩丹頓等，真係多到數唔晒。
余絲韻