絲絲講場：中銀股東會夠和諧
近期唔少股東會上都出現火爆場面，一係小股東怒爆指摘管理層，一係管理層對小股東採取闊佬懶理嘅態度。絲絲尋日去咗中銀香港（02388）嘅股東會，有小股東同絲絲講，話中銀嘅股東會夠晒和諧，氣氛好好呢！
婆婆大讚做得好
好多香港人擔心被「河蟹」，不過畀人讚夠和諧，副董事長兼總裁和廣北就好開心，有位婆婆小股東好讚賞佢哋班管理層做得好，和總不斷笑笑口，好謙虛咁話唔敢當。另外亦有小股東話好關心中銀有乜工作機會畀到大學畢業生，唔知係咪佢有親朋戚友剛啱畢業，一心想入中銀做？
股東會一直係小股東及管理層難得嘅溝通機會，所以一向有好多小股東捧場，絲絲見過好多股東趁機向管理層討教，當然公司若做得唔好，又冇息派，股東會就會變成小股東嘅出氣場地，以中銀股東會尋日嘅氣氛，小股東應該相當滿意。
余絲韻