絲絲尋日收到富昌證券總經理兼「狂牛隊」領隊藺常念嘅電話，先知道原來第5屆「金融界精英籃球賽」第一輪循環初賽已於剛過去嘅周日展開，暫時勝出隊伍係「狂牛隊」（由不同嘅金融圈業界組成）、滙豐銀行、恒生銀行（00011）及港交所（00388）。藺Sir坦言金融界有好多人都鍾意打籃球，所以今年渣打銀行、永亨銀行（00302）亦加入戰團。今年勁敵咁多，絲絲相信各隊伍為咗贏取冠軍盃，到決賽時一定好精彩。
記得去年恒生贏咗總冠軍，「狂牛隊」就屈居第二，為咗一雪前恥，藺Sir好認真咁話：「依家我哋個個禮拜都練波，每次打足兩小時，不過最衰我係呢個比賽嘅搞手，所以唔可以落場打，否則一定贏晒全場。」
不過，絲絲收到可靠線報，知道滙豐有個6呎5吋高嘅英國人做中鋒，令實力增強不少，點知藺Sir就話未驚過：「我哋狂牛隊都有個隊員係6呎6吋高，另外教練又係前港隊甲組籃球隊員，我哋實力一啲都唔弱。」
聽藺Sir咁講，今次比賽應該會好激烈，絲絲一於帶埋班姐妹去做啦啦隊！
余絲韻