前兩日放工回家，指定動作當然是上網收電郵兼睇Facebook，有朋友傳來一段本地報章的新聞，標題是「兒子生性病母倍感安慰」。我即時動用邏輯、陰謀論，甚至以奇想去推敲母親為何會感到安慰……原來是一場誤會，我諗多咗。所以話眼見未為真，多口問清楚總冇蝕底。
其實那篇報道是說患病母親獨力養育兒子，對兒子生性、懂事感到安慰。鬧出如此笑話，到底是讀者多心，還是作者誤導？結果相信是一場誤會。我們難免有時諗多咗，搞出笑話，但投資時又往往諗得唔夠多，傷了自己銀包。
其實在「迷債」事件前，證監會已對投資產品的銷售文件有不少要求，目的同樣在於披露風險。現在證監會的要求自然更高，各界亦強調要向投資者披露風險，讓投資者了解產品。坦白說，絕大部分投資產品銷售文件的重要條文都由「外星中文」寫成，在英文為本，加上法律要求及避免揹鍋的環境下，條文被撰寫得非常冗長，讀來更覺兜兜轉轉難以理解，愈解釋愈難明。
在投行的一班銷售員及律師的努力下，若然諗多咗便會將原意令投資者了解產品的銷售文件，變成連作者自己也看不懂的文字，投資者卻無暇細讀，便作出投資決定。無論諗多咗還是諗少咗都會搞出誤會，其實溝通傳意不止文字一個方法，必要時不妨多問一句，不明白便不要投資，保障自己最重要。
（大健）