孖妹缸湖遊：高瞻遠矚認清大趨勢

去年籲買企債豐收

個別股票表現唔單止基於盈利預測，仲要取決於投資者信心、對風險認知等。美國經濟開始復甦，銀行仲要清理問題貸款，要預測聯儲局嘅行動似乎容易好多。相較於預測股票走勢，全球宏觀（Global Macro）要睇嘅數據較廣泛，變動亦較慢，情形就與太空人望落地球一樣，企喺高空嘅視野會更清晰。

瑞銀財富管理亞太區研究部主管兼亞太區首席投資策略師浦永灝喺九七年開始加入金融界，入行之前教咗十幾年書，佢擅長用利率及經濟增長等宏觀因素分析大市，認為「齋」睇估值冇乜作用，所以重視大趨勢看法。佢過去戰績包括在○七年底認為大市升得太高，頻頻叫人沽貨獲利；去年初呼籲大家買企債，結果○九年企債回報破紀錄咁可觀。

恒指年底料升20%

莉 莉︰你擁有統計學碩士學位，相信技術分析嗎？

浦永灝︰統計學對理解過去市場有幫助，舉例如市場利率很高時，熊市就會來臨，但喺統計學上，要保證喺相同條件下，後市表現才會與之前一樣，每個金融危機背後嘅導火線不同，可以係貿易逆差、政府欠債太多或銀行過度貸款，所以分析大市時仍需加入各項元素，才可作出規律嘅判斷。坦白講，其實我唔係好相信技術分析，但市場上好多對沖基金只睇成交量、趨勢嚟炒賣，呢種「走捷徑」做法比較間接，我就着重價值投資法，鍾意用多啲時間睇基本面。

高 妹︰散戶睇長線，通常喺有「蟹貨」嘅時候，長線恒指走勢會點？

浦永灝︰受環球通脹、希臘事件影響，已見到資金流出亞太區股市，基金提高組合嘅現金水平、資金流向美國國債，喺內地調控政策未結束前，港股仲係「麻麻地」，估計五、六月會整固一段時間，好難衝破波幅。長遠嚟講，喺全球經濟復甦、企業盈利增長及私人消費增加下，預料今年底恒指會上升20%。

揀股視乎長揸短炒

莉 莉︰咁即係話恒指今年底會見約24,000點喎，應該買邊一類股份？

浦永灝︰買乜嘢股份要視乎投資區間有幾長，3至6個月可選擇防守性高嘅股份，如電訊、公用、消費必需品及機械設備股；短線就投資消費電子及醫療股，醫療股長線有增長，但短線就較貴。IT股及出口股都唔錯，喺科網股爆破後，IT股未有升值太多；出口股就要選取高附加值嘅企業，盈利唔易受勞工成本上升拖累，對人民幣升值嘅敏感度亦唔會太大，當中包括賣品牌及出口醫療機械設備嘅相關股份。

高 妹︰一直捱打嘅內房股及內銀股，今年命運如何？

浦永灝︰依家內地房地產交投量跌咗好多，但價格仍未跌落嚟，若房價再升，預計中央會再出招調控，相信今年下半年收緊措施唔會太多，會穩定下來。至於內銀股，理論上加息可擴大利差收益，房地產貸款就唔會增加，但中小企貸款可以有增長，有利銀行業務。

歐債風暴危中有機

莉 莉︰你擔唔擔心歐債危機拖累中港股市？

浦永灝︰得到援助資金後，希臘可鬆一口氣，但危機唔可能咁快結束，過去5年希臘嘅勞工成本上升40%，德國只增加10%，希臘競爭能力不如德國，未來仍要靠削減政府開支嚟減赤。不過危中有機，從經濟角度睇，中國出口至所有歐洲國家嘅比例較少，不到20%，對經濟增長影響唔大。全球商品價格趁機回落，如鋼、銅及油，通脹壓力小啲。美國聯儲局亦會推遲加息，中國收緊政策嘅速度會放慢，各國可以「等一等、看一看」，才進一步落實退市。

高 妹︰預計內地幾時加息？

浦永灝︰內地四月份通脹率2.8%，估計五至六月份通脹會更高，因為去年基數低，估計喺第二季末至第三季初會加息，全年料加息一次。人民幣就會推遲至第三季升值，會轉向跟一籃子貨幣掛鈎。

莉 莉︰有乜嘢建議畀投資者？

浦永灝︰「平常心」，要知道市場總會波動，投資者應該將市場放喺大環境及以長時間嚟睇，會睇得清楚一啲。估值貴，會往下插；經濟好，股市總會往上。

所以大家試吓換另一個角度睇恒指，就會開心啲：撇除金融海嘯前後嘅變動，大市由○六年至今一直穩步上升，○六年至上周五計起，恒指升咗近40%，滬綜指仲勁，升咗1.3倍。

賣地冷淡76%人估發展商施壓

政府今年首次賣地，但反應較預期冷淡，有意見認為政府之前遏抑樓市，今次係發展商向政府施壓，你又點睇？據今期《東方產經》網上民意調查，截至上周末晚上6時，76%人認為係發展商向政府施壓，唔認同嘅就有24%。

高妹、莉莉

若有料報畀高妹同莉莉或有嘢問，可電郵money.biz@opg.com.hk