市場熱線：中糧穩健內需股
歐洲債務危機持續，令投資者擔心正復甦的全球經濟再度轉壞，在避險情緒升溫下，上周五各地魚缸插水，歐元跟英鎊急挫，「油魔」亦病埋一份，環球投資情緒欠佳。歐洲三個主要魚缸，上周五以紅酒國魚缸跌4.5%最大鑊，米字旗國及啤酒國魚缸亦齊齊跌逾3%，拖累花旗魚缸三大指數一度跌超過2%，金融股屬重災區。散場前三大指數跌幅收窄，道指跌1.5%，納指及標普500指數分別跌1.9%及1.8%。
後市表現未宜樂觀
歐洲的主權債務危機，已逐步演化成對歐元信心動搖的悲劇，雖然「歐豬五國」已承諾削減債務，但暫時缸邊友睇唔到有乜辦法可解決問題，歐元亦只有進一步下跌。歐美魚缸疲弱，本地魚缸上周五在花旗掛牌的ADR全面仆直，唔少重磅股更跌逾1%，當中以石油及資源股跌幅較為顯著，中鋁（02600）急跌4.7%，皆因花旗或向其產品徵反傾銷稅。本地魚缸今日肯定低開，不過唔少斷估專家跟講股佬均認為，恒指在19,800點有支持，古勝反而冇咁樂觀，尤其係北大人仍積極打壓祖國屋仔市場，缸湖傳聞上海最快在今日決定是否推出房產稅，本地魚缸兩面受敵，祖國的調控政策未停，而歐洲債務危機愈演愈烈，均令本地魚缸短期只有波幅，難有升幅。
在如此市況下，古勝提過內需股係較為穩陣股份，上周五品題聯想（00992）避過一跌，反映古勝睇中資金流點走。今日睇番內需股，中國糧油（00606）近日在10元水平附近進行整固，一旦市況有所改善，中國糧油在走勢靠穩下，料可率先反彈。
食品價格易升難跌
中糧去年份成績表麻麻地，不過今年祖國食品價格有所回升，以及集團計劃明年將油籽加工產能增加至828萬公噸，料相關業務可得到改善。加上人仔升值預期，祖國亦受「通脹怪獸」所威脅，食品價格當然係有升無跌，中糧料可受惠。至於大豆跟小麥等農產品價格，近期亦見回穩甚至有所滑落，古勝預計中糧今年的毛利率可回復穩定，相信今年上半年整體業務，將較去年上半年及下半年好。公司在今、明兩年致力擴產，目標係兩年後其產能可翻一番。至於缸湖一直有傳聞，阿媽在今年內向中糧注入業務，亦將成為刺激股價向上的催化劑。
古勝