愈嚟愈多內地公司來港上市，造就內地唔少億萬富翁上位，唔講唔知，廣東及遼寧原來係全國出產最多富豪嘅省市。內地有財經雜誌發表「2010新財富500富人榜」，遼寧萬達集團嘅王健林以401.1億元（人民幣‧下同）身家排榜首，比亞迪（01211）嘅王傳福及騰訊（00700）嘅馬化騰分別位列第4及第5，兩人嘅身家分別有343.3億元及334.2億元。
絲絲仲發現，比亞迪令到身為王傳福表哥嘅呂向陽躋身內地金融界別嘅首富，因為佢持有3.9億股比亞迪，市值235億元，佢喺表弟王傳福創辦比亞迪時一次過投入咗300萬元，呢筆投資帶挈佢發大達！
喺500位富豪中，榜上有名嘅廣東人有109人咁多，佢哋嘅人均財富較上年上漲咗一倍多，證明廣東人喺經濟反彈下嘅財富增長動力好勁。眾所周知，從去年初開始中國房地產市場熱爆起嚟，所以不難估計地產商人佔咗富豪榜好大比例，喺26位身家逾百億嘅超級富豪中，有9位就係來自房地產。
余絲韻