絲絲尋日得閒，專登去咗恒生（00011）嘅股東會，有小股東對於恒生嘅員工培訓人才計劃好熱心咁提供意見，但亦有小股東話想知喺去年股價低迷時，點解恒生唔出手回購托住個價？另一位小股東亦提出同樣問題，話恒生喺當年九七、九八年金融風暴時不知幾好，日日回購股份，且數額不知幾厲害，但去年不但冇回購，仲大減股息，以恒生實力又唔係咁窮，認為咁做有啲令人反感。
呢位小股東仲趁機會提醒恒生嘅董事會，尤其係梁太（副董事長兼行政總裁梁高美懿），好希望恒生能夠秉承傳統穩健嘅作風，唔好減股息，免得影響股東及客戶對恒生嘅觀感。
另一位小股東就大讚之前主政的「柯大俠」（前副董事長柯清輝），佢話喺柯大俠領導下，恒生去年既冇賣迷債，又冇持有次按，兼且大派股息；又話去年滙控（00005）股價畀人踩到死嘅時候，身為阿仔嘅恒生可以置身事外，冇受影響，真係好多謝柯大俠，即時博得全場掌聲，似乎呢番說話係成班小股東嘅心聲。董事長錢果豐就回應話，董事會成員已經收到佢意見，亦會作出考慮，相信呢位小股東聽到後條氣都會順番啲。
余絲韻